Ineqarneq pillugu aaqqissuusseqqinnissaq pillugu politikkikkut isumaqatigiissut maanna isumaqatigiissutigineqarpoq

Ineqarnermut Attaveqaasersuutinullu Naalakkersuisup Hans Peter Poulsenip naammagisimaarinnilluarluni maanna nalunaarutigisinnaanngorpaa, ineqarneq pillugu aaqqissuusseqqinnissaq pillugu Naalakkersuisut aamma IA Siumullu, - akornanni politikkikkut isumaqatigiissusiormata. Isumaqatigiissut 2023-mit 2033 tikillugu atuutissaaq. Politikkikkut tunngavigisaq, suliniutillu aallartinneqarsimasut ukiut pingasukkaarlugit nalilersorneqartassapput.

Naalakkersuisoq Hans Peter Poulsen ima oqarpoq:
”Ineqarneq pillugu aaqqissuusseqqinnissaq pillugu politikkikkut isumaqatigiissut, nuannaarutigalugu ullumikkut saqqummiussinnaanngorparput. Isumaqatiginninniarnermi peqataanermikkut isumaqatigiissummut, aaqqissuusseqqinnissallu imarisassaanut tapersiissuteqartut tamaasa qutsavigaakka. Ineqarneq pillugu aaqqissuusseqqinnissaq pillugu isumaqatigiissuteqarnitsigut, ineqarnermut suliassaqarfimmi unammillernartut ataatsimoorluta qanoq aaqqiiviginiassanerlutigit isumaqatigiippugut, siunissamilu suleqatigiinnissaq aalaakkaasumik sinaakkuserneqarluni.”

Inuit Ataqatigiit sinnerlugit atsioqataasoq ima oqarpoq:
”Inuit Ataqatigiit isumaqarput ineqarneq pisinnaatitaaffiusoq. Nunatsinni Inuiaqatigiit siammasissumik najugaqariuseqarput nunamilu ineqarnikkut atugassarititaasut, periarfissaasullu assigiinngillat. Pisortat inissiaataani ineqarnikkut atukkagut naligiinngippallaarput, taamaammallu pisariaqartipparput ineqarnikkut aaqqissuusseqqinnissaq aqqutissiuutissallugu, inuiaqatigiinni ineqarnerup naligiinnginnera atuuttoq pillugu. Inuiaqatigiit ataqatigiinnerini kiisalu inooqataanikkut, peqqissutsikkut, aningaasatigullu naligiinnginnermut ineqarneq pillugu politikki qitiusumik inissisimavoq. Taamaattumik inuiaqatigiinni unammillernartitatta ilaasa iluarsineqarnissaannut tapertaasinnaasumik, ineqarnikkullu toqqissisimanermik pilersitsisinnaasumik maanna politikkikkut isumaqatigiissusioratta nuannaarutigaarput.”

Siumumut sinniisoq ima oqarpoq:
” Ineqarneq pillugu nutaamik aaqqissuussinissamut isumaqatigiissut inissiatigut atugassarititaasut oqimaaqatigiinnerulernissaanut siunniussinermik aallarniissaaq, aamma inunnut ataasiakkaanut ilaqutariinnullu kiffaanngissuseqarnermik pilersitsisussaassaaq. Isumaqatiginninniarnermi Siumumut pingaarsimavoq toqqammavilissallugu, allannguinissat aningaasaqarnikkut toqqissisimanartumik naapertuilluartumillu ingerlanneqassasut, aamma tamanut eqqortumik aaqqissuussineq pissasoq. Pingaarpoq qulakkiissallugu aaqqiissutissat amerlanernut iluaqutaaginnaratik, aamma inuiaqatigiinni assigiinngitsorujussuarmik atugassaqarnitta illuatungilernissaa. Taamaammat aaqqissuuseqqinnermi pilersinniarsimavagut politikit, inuup pisariaqartitaanut tunngaviliisussat, ilutigisaanillu nuna tamakkerlugu nammineq illuuteqalernissamut periarfissiissutaanerusussat. Pilersikkumavagut inuiaqatigiit, innuttaasut tamarmik ataasiakkaatullu illuutitaarnissaminnut namminneq sunniuteqarnissamut periarfissaqarnissaat, aamma namminneq ilusilersuisinnaanissaat.”

Ineqarnermut suliassaqarfimmi aalajaatsunik killissaliussinissamik aammalu politikkikkut anguniagaqarnernik siunissamilu politikkissamut tunngaviusussanik aalajangersaanissamik siunertaqarluni sulinissamut allakkiatut, politikkikkut isumaqatigiissut isigineqassaaq. Ineqarnermut aaqqissuusseqqinnissami immikkoortut kiisalu siunissami suleqatigiinnissaq qanoq ingerlassanersoq isumaqatigiissummi nassuiaatigineqarput.

Ineqarnermut aaqqissuusseqqinnikkut ineqarnermut suliassaqarfimmik oqimaaqatigiittumik pilersitsinissaq anguniagaavoq.

Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl

Isumaqatigiissut uani atuarneqarsinnaavoq